Midoble ang balur alang sa lot acquisition sa Cebu Bus Rapid Transit (CBRT) project gikan sa P900 Million ngadto sa P1.7 Billion kini gumikan sa kalangay sa pagpalit ug nagkataas nga balur sa luna.
Matud pa ni Cebu City Mayor Nestor Archival, nga ang nag-ung-ong nga land acquisition nag-aghat sa City Government nga ikonsiderar ang expropriation–usa ka proseso diin ang gobyerno nagkuha sa pribadong kabtangan alang sa publiko nga paggamit – aron masiguro ang kinahanglan nga road right-of-way (RROW).
Kini nga isyu maoy sentrong gihisgutan atol sa panagtigom niadtong Martes uban sa CBRT proponent ug sa contractor sa Project s Package 1, nga adunay gitas-on nga 2.38 kilometros gikan sa Cebu South Bus Terminal sa N. Bacalso Ave paingon sa uptown area duol sa Capitol building.
Matod ni Archival nga sa 55 ka mga tag-iya sa lote nga apektado, 25 lang ang nisugot nga ibaligya ang ilang mga kabtangan atol sa negosasyon. Alang sa mga dili gusto nga makigsabut, ang pag-agaw karon usa ka seryoso nga konsiderasyon.
Kung madayon ang proseso sa expropriation, ang City Government mopasaka og kaso ug magdeposito og labing menos 15 porsyento sa gi-assess nga kantidad sa lote sa usa ka bangko, nga magtugot niini nga makuha dayon.
Usa ka lahi nga hagit mao ang kapakyasan sa kontraktor sa pagkab-ot sa gisaad nga Hunyo 30 nga deadline alang sa Package 1.
Giklaro usab sa kontraktor, ang Chinese firm nga Hunan Road ug Bridge Construction Group Ltd.,nga ang deadline niini sa kontraktwal mao ang Agosto 11, hinungdan nga giduso ang trial sa proyekto ngadto sa Agosto.
Gikuwestiyon usab ni Archival kung nganong mipasalig ang maong kompanya sa Hunyo 30, nga nagsugyot nga ang kontraktor posibleng”napugos lang sa pag-uyon” tungod sa mga kalangan.
Una nang nakaaghat sa mayor sa pag-anunsyo ang napakyas nga deadline niadtong Hulyo 13, nga iyang i-blacklist ang kompanya sa mga umaabot nga kontrata sa City Government. | Bombo Nathaniel Sandoval
