Target sa Gilas Pilipinas nga makalangkat og bulawang medalya sa FIBA Asia Cup sa taliwala sa mga nakalinya nga bug-at nga kontra.
Hilabi na nga ang naasoy nga kalampusan kay wala pa makab-ot sa nasod sa milabayng upat ka dekada.
Matod ni Gilas head coach Tim Cone, ang team maninguha nga makalusot sa elimination match ug makaabot sa final stage sa kompetisyon aron makadala og bulawan alang sa Pilipinas.
Nalinya ang national team sa Chinese Taipei, New Zealand, ug Iraq ubos sa Group D. Ang No. 1 team sa upat ka teams human sa unang elimination round awtomatik nga moabante sa quarterfinals.
Ang No. 2 ug No. 3 teams aduna pay kahigayonan nga makasulod sa top-8 spots sa crossover playoffs.
Gikatakda ang unang duwa sa national team karong Agosto 6 batok sa Chinese Taipei ug sundan kini og duwa batok sa New Zealand sunod adlaw, Agosto 7.
Ug katapusang duwa sa Gilas maoy batok sa Iraq karong Agosto 9.
Sa pagkakaron, matod ni Cone nga solido ang lineup sa nasod nga gipangulohan sa mga seasoned basketball players sama nila ni Justin Brownlee, June Mar Fajardo, Japeth Aguilar, Chris Newsome, Kevin Quiambao, ug uban pa.
