Giklaro ni Presidente Ferdinand Marcos Jr., nga ang bag-ong desisyon sa Korte Suprema walay kalabotan sa kamatuoran o kabakakan sa mga akusasyon batok kang Bise Presidente Sara Duterte nga anaa sa impeachment complaint nga iyang giatubang.
Matod sa presidente, ang Korte Suprema lamang ang naghisgot ug nagdesisyon sa mga isyu sa procedural, ug dili ang unod sa reklamo.
Giinsister sa presidente nga walay trial ug wala usab gilalisan ang unod sa impeachment complaint.
Busa, wala kini magpasabot nga wala nay dugang panaghisgot sa responsibilidad.
Subling gipasabot sa presidente nga walay papel ang ehekutibo sa impeachment proceedings, busa dili siya makaapil niining butanga.
Matod niya nga ang Korte Suprema, Kamara ug Senado lang ang adunay papel sa proseso sa impeachment.
Kahinumduman nga sa disisyon sa Korte Suprema, gihingusgan niini nga ang maong reklamo nakalapas sa konstitusyon, partikular na ang usa ka tuig nga bar rule ug napakyas sa paghatag og due process sa respondent, nga maoy nahimong dalan sa pagkanselar sa pagbukas sa diskusyon sa reklamo.
Kaniadtong Miyerkules, gibotar sa Senado ang pag-archive sa impeachment complaint batok kang Bise Presidente Duterte.
