Gilimod sa Malacañang ang pamahayag ni Bise Presidente Sara Duterte nga nanimaho og ilimnong makahubog si Presidente Ferdinand Marcos Jr. sa dihang iyang gidawat ang pagluwat niini isip kalihim sa Department of Education (DepEd) niadtong 2024.
Matod ni Communications Usec Claire Castro, tataw nga ang mga pasangil ni VP Sara kabahin lang sa propaganda aron pakauwawan ang presidente.
Dugang pa niini nga momata og sayo kada adaw ang Presidente alang sa mga panghitabo ug importante nga mga miting, nga nagpakita nga siya seryoso ug kugihan sa iyang trabaho.
Ingon man nga giingong dili kini sama sa ubang mga lider nga momata sa udto ug mamahimo pang hinungdan nga magbilar ang mga media tungod kay maghulat sila og dugay alang sa coverage.
Gihisgotan usab ni Castro ang giingong sumbanan sa pagpakatap og sayop nga impormasyon sa kampo ni Duterte, lakip na ang isyu sa peke nga report sa kapulisan sa Beverly Hills ug ang nikatap nga polvoron video nga sa ulahi napamatud-an nga peke.
Matod niya klaro nga nagpakita kini sa hakog nga tinguha ug motibo ni VP Sara nga ipalagpot ang Presidente aron kini mopuli.
