CENTRAL VISAYAS- Gipahibalo sa Police Regional Office 7 (PRO7) ang ilang hingpit nga pagpangandam alang sa umaabot nga protesta nga ipahigayon sa grupo nga Hugpong Sugboanon Batok Korapsiyon sa Plaza Independencia, karong Domingo, September 21, 2025.
Nipasalig si Police Brigadier General Redrico A. Maranan, Regional Director sa PRO7, nga nahuman na ang tanang gikinahanglang preparasyon aron masiguro ang kalinaw ug kahapsay sa maong kalihokan.
Gipahimangnoan usab niya ang mga pulis nga magpakita og “high tolerance” ug naglaum nga magpadayon ang panaghiusa ug kalinaw sa syudad.
Nanawagan siya sa mga magprotesta nga siguraduhon nga adunay angay nga permit ug ipahigayon ang protesta sulod lamang sa gitudlo nga lugar aron malikayan ang samok ug makaapekto sa mga residente ug negosyo sa palibot.
Gipahinumdoman usab niya ang publiko nga ang mga Sugbuanon nailhan nga mahigalaon ug mga tawo nga sumusunod sa balaod.
Girespeto sa kapulisan ang katungod sa katawhan sa pagpagawas sa ilang mga panawagan basta kini dili makadaut sa kalinaw ug seguridad sa komunidad.
Padayon ang suporta sa PRO7 sa mga paningkamot alang sa malungtarong kalinaw ug kahapsay sa tibuok rehiyon.
