Gisugdan ni Cebu Archbishop-Designate Alberto “Abet” S. Uy ang iyang unang adlaw isip bagong Arsobispo sa Archdiocese of Cebu pinaagi sa kalihokan nga puno sa pagpakabana, panaghiusa, ug kadasig sa pag-alagad, karung adlawa September 29, 2025.
Sayo sa buntag, nanguna si Archbishop Uy sa usa ka tree-planting activity sulod sa Archbishop’s Residence Compound, usa ka simbolikong buhat nga nagpakita sa iyang pagpangga sa kinaiyahan ug sa panglantaw sa mas malungtaron nga kaugmaon alang sa Sugbo.
Gikan didto, mibisita siya sa Abtanan sa Kaluoy (ASK) sa Barangay Mabolo, Cebu City, usa ka serbisyo sa Archdiocese nga nagtabang sa mga kabataan nga nagapuyo sa kadalanan.
Didto, personal nga nangulo si Archbishop Uy sa usa ka feeding program alang sa kapin 200 ka mga kabataan ug 50 ka mga hamtong.
Sa panaghinabi sa Bombo News Team, gibutyag ni Fr. Pat Ornopia, Executive Director sa ASK, ang iyang dakong katingala ug kalipay tungod sa malumo ug matinud-anong kasingkasing sa bag-ong Arsobispo, ilabi na sa iyang pagpakig-uban sa mga ordinaryong tawo.
Gani, gipaambit ni Fr. Pat nga namulong ang Arsobispo nga siya alang sa tanan, dili lamang sa mga tawo nga anaa sa mga opisina, apan apil usab kadtong anaa sa kadalanan o karsada, uban sa mapainubsanon nga pag-ingon,“Tawga ko ninyo og Papa Bishop.”
Human sa iyang pagpangadyi ug pag-alagad sa katawhan, nakigtagbo usab si Archbishop Uy sa mga lider sa lokal nga panggamhanan sa Sugbo.
Gihangop siya nila Cebu City Mayor Nestor Archival, Vice Mayor Tommy Osmeña, mga konsehal, mga department heads, ug ubang mga alagad sa simbahan.
Atol sa mensahe sa Arsobispo, gihatagan niya og dakong gibug-aton ang nag-unang kontrobersyal nga isyu sa ‘ghost projects’ sa nasud, diin iyang giinsistir nga dili angay tugutan ang pag-usik-usik sa kuwarta nga para unta sa katawhan.
Gilitok niya ang mga pulong nga,“No to ghost projects, Yes to Godly projects.”
Dugang pa, nagpahayag siya og dakong pagpasalamat sa mga Sugboanon sa mainiton nga pag-welcome kaniya, gikan pa sa iyang pag-abot hangtod karon sa mga sunod-sunod nga kalihukan sa iyang pag-asumir isip bag-ong Arsobispo sa Sugbo.
Ang unang adlaw ni Archbishop Uy sa Sugbo usa ka hulagway sa simbahan nga buhi, duol sa katawhan, ug nagpalandong sa pagkamatinud-anon sa misyon nga pag-alagad sa tanang sektor sa katilingban, datu man o kabus, anaa man sa maanindot nga balay o sa karsada.
