Nipahimangno ang mga sakop sa kapulisan sa dakbayan sa Sugbo sa publiko nga ipaagi sa laing pamaagi ang paghatag og tabang sa mga mangayo og limos.
Atol sa pakighinabi sa Bombo Newsteam kang PCapt. Charisma Gonzales, ang tigpamaba sa Cebu City Police Office, nakasabot kini nga maluluy-on og kasing-kasing ang mga Pilipino, apan kinahanglan nga mosunod sa ordinansa hilabi na nga adunay multa ang maaktuhan nga mohatag og limos.
Kini nunot sa mga taho nga giingong adunay mga nagpaluyo nga sindikato sa mga manglimusay sa kadalanan sa dakbayan sa Sugbo.
Ingon man nga nimando na si PCol. Enrico Figueroa, Acting City Director ngadto sa City Intelligence Unit aron sa pagtigom og mga impormasyon kabahin sa mga lugar diin posibleng butangan sa mga indibidwal nga ilang ipaon aron mangayo og limos.
Una usab niini, nakaplano na lokal nga kagamhanan sa pagpahigayon og imbistigasyon aron susihon ang mga giingong nagpaluyo sa mga manglimusay ug mga inahan nga nagdala ug menor de edad sa nagkandaiyang kadalanan.
Diin gibutyag ni Cebu City Mayor Nestor Archival, nga i-convene niini ang Anti-Mendecancy Board, aron sa pagsuta sa mga giingong adunay mga modus.
