Ipahigayun sunod semana ang bag-ong traffic scheme sa kadalanan sa C. Ouano Street sa Barangay Looc, dakbayan sa Mandaue, tumong sa maong dry run mao ang papadali sa on-going road concreting ug drainage project sa maong dapit.
Kini human nga gipaambit sa mga opisyales sa nahisgutang lugar ngadto kang Mandaue City Mayor Thadeo “Jonkie” Ouano ang ilang kabalaka sa kahout sa dagan sa trapiko ug ang grabeng pagbaha sa kadalanan tungod sa mga proyekto nga gipahigayun sa barangay.
Gibutyag niini nga posible pang malangan ang proyekto ug mosamot ang pagbaha sa lugar tungod sa kanunayng pag-agi sa mga bug-at nga mga sakyanan.
Gipasiugda usab sa Mayor ang pagpatuman sa bag-ong traffic scheme ug nakig-alayon kini sa Traffic Enforcement Agency sa Mandaue (TEAM) lakip na ang mga opisyales sa Barangay Looc, aron makighinabi ug hisgutan ang pagpatuman niini.
Gimandoan usab ni Ouano, ang TEAM nga mohimo og traffic plan aron maabisuhan ang publiko nga moagi sa maong kadalanan, hilabi na sa mga nagmaniho og dagkong sakyanan.
Gihisgutan usab atol sa panagpulong sa mga opisyal ang pag-susi sa kahimtang sa Looc Gym human sa mga linog sa miaging semana.
Gipasiguro usab sa Mayor nga susihon sa City Engineering Office (CEO) ug Office of the Building Official (OBO) ang Looc Gym aron masiguro ang kaluwasan ug seguridad sa mga lumolupyo sa Looc.
