Padayon sa gibantayan karon sa gobyerno ang gibiling kadaot sa Bagyong Tino diin anaa na sa kapin 340,000 ka mga indibidwal gikan sa 1,397 ka mga barangay sa mga rehiyon sa MIMAROPA, Bicol, Western at Central Visayas, Eastern Visayas, Caraga, ug Negros Island Region sumala pa ni Presidente Ferdinand “Bongbong” Marcos Jr.
Sumala sa presidente nga daling nagpatuman og pre-emptive evacuations ang pipila ka mga lokalidad diin kapin sa 175,000 ka mga tawo ang kasamtangang anaa samga evacuation centers.
Gani naka-preposition na sab ang Department of Social Welfare and Development (DSWD) sa mga family food packs ug relief goods aron ipang-apod.
Ingon man nga pipila ka mga miyembro sa gabinete ang muadto sa pinaka-apektadong probinsya aron personal nga sutaon ang kahimtang sa mga lumulupyo og daling ibalik ang mga batakang serbisyo.
Samtang sa iyang bahin, mipadangat og mensahe si Bise Presidente Sara Duterte diin matod pa nga ang Office of the Vice President Disaster Operations Center kay nakaandam na sab sa ilang pagdalit og suporta ug augmentation sa mga lokalidad sa ilang disaster response.
Giawhag sa mga opisyal ang publiko na magpabiling alerto karong panahona ug maminaw sa pahimangno sa mga lokalidad alang sa kaluwasan sa tanan.
