Napun-an pa ang ihap sa mga nakalas sa nahitabong dakong sunog sa Wang Fuk Court sa amihanang distrito sa Tai Po, Hong Kong.
Diin basi sa gipagawas nga interim wrap-up report sa mga awtoridad human nahuman ang search and rescue operation sa tibuok pasilidad, misaka ngadto sa 159 ang natala nga namatay.
Sa 159 ka mga patayng lawas nga narekober, 140 ang nailhan na samtang ang uban padayon pa nga giila.
Basi sa report, usa ka 97 anyos nga indibidwal ang giila nga labing tigulang nga namatay samtang ang pinakabata usa ka tuig nga bata.
Bisan pa sa taho, wala giwagtang sa mga awtoridad sa Hong Kong ang posibilidad nga mosaka ang ihap sa mga namatay.
Kini human gibutyag ni Hong Kong Police Commissioner Joe Chow nga aduna pa’y nakit-ang ‘gidudahang mga bukog sa tawo’ nga kinahanglan pang ipaubos sa forensic testing alang sa kumpirmasyon.
