CEBU CITY- Napuno sa pag-ampo ug kadasig ang kadalanan sa Dakbayan sa Sugbo samtang liboan ka mga deboto sa Senior Santo Niño ug sa Birhen Maria ang miapil sa tinuig nga Penitential “Walk with Mary.”
Nagsugod ang prosesyon sa pag-abot sa imahen sa Our Lady of Guadalupe de Cebu gikan sa Guadalupe Shrine padulong sa Fuente Osmeña Circle ug dayon sa Basilica Minore del Santo Niño de Cebu, aron mouban sa Balaang Bata—usa sa mga pangunang highlight sa pista sa dili pa ang pag-abot sa Fiesta Señor ug Sinulog.
Sama sa Penitential “Walk with Jesus,” ang mga deboto gikan sa lain-laing dapit sa Sugbo ug mga silingang probinsya nagtigom na sa ilang mga puwesto alas 3 sa kaadlawon, samtang opisyal nga nagsugod ang prosesyon alas 4 sa kaadlawon.
Sa ilang paglakaw uban ni Maria, napuno sa pag-ampo sa Santo Rosaryo ang tibuok panaw samtang gidala ang imahen sa Birhen sa Guadalupe, ang patron sa Sugbo.
Daghang mga deboto usab ang naghulat sa Basilica sa pag-abot sa Birhen Maria, diin gipahigayon ang Santos nga Misa nga gipangulohan sa mga paring Agustino.
Makita nga lig-on ang pagtuo sa mga Kristiyano sa mga milagro sa Birhen Maria. Usa niini mao si Ayet Labares ug ang iyang bana, kansang pagtuo mas misalig ug milig-on sulod sa kapin sa 58 ka tuig nilang padayon nga pag-apil sa Penitential “Walk with Mary.”
Gipaambit usab nila ang ilang mga natuman nga pangandoy ug ang pagpalig-on sa ilang relasyon, nga ilang giila nga bunga sa grasya ug giya sa Birhen Maria, ingon man sa Balaang Bata.
Sa laing bahin, giseguro sa Cebu City Police Office (CCPO) ang kahapsay ug kaluwasan sa kalihokan, uban sa tabang sa mga tanod sa barangay ug nagkadaiyang boluntaryong grupo.
Sumala sa inisyal nga mga report, walay natala nga dagkong insidente bisan pa sa kadaghan sa mga miapil sa maong kalihokan.
Ang Penitential “Walk with Mary” nagsilbi usab nga simbolo sa lalom nga pagtuo sa mga Sugboanon ug pasalamat sa mga panalangin nga ilang nadawat pinaagi sa Birhen Maria.
