Miluwat Si Mayor Nestor Archival sa Dakbayan sa Sugbo og Executive Order (EO) nga nagpatuman sa pagdili sa ilimnong makahubog sulod sa 300-metros nga radius sa ruta sa Sinulog Grand Parade.
Ubos sa EO 051, ang pagdili sa ilimnong makahubog moepekto sugod sa alas 6 sa buntag hangtod alas 8 sa gabii sa Enero 17. Ang pagdili ipatuman usab sa Enero 18 gikan sa alas 6 sa buntag hangtod alas 8 sa gabii.
Si Col. George Ylanan, hepe sa Cebu City Police Office, miingon nga ang pagdili sa ilimnong makahubog estrikto nga ipatuman.
Sigon ni Ylanan nga ang mga personahe ipadala sa mga establisemento nga namaligya og ilimnong makahubog aron ipahibalo ang pagpatuman sa pagdili sa ilimnong makahubog.
Dugang ni Ylanan nga ang mga pulis estrikto nga magmonitor sa mga establisemento sa komersyo aron masiguro ang pagsunod sa pagdili.
Gihimug-atan usab ni Ylanan nga ang pagdili sa ilimnong makahubog gituyo aron malikayan ang kagubot nga mahitabo atol sa kapistahan.
Dugang usab niini nga upat ka bus ang ipakatap ug magsilbing temporaryo nga custodial facility alang niadtong madakpan nga naghimo og kagubot.
Samtang, liboan ka pulis ang ipakatap atol sa Sinulog ug bahinon sa 11 ka sektor uban sa ilang tagsa-tagsa ka ground commanders.
