Gipanglangtawan ni Erwin Gok-ong, ang Chairman sa Cebu Market Vendors Development Cooperative (CEMVEDCO) nga ang nahimong kasaaran sa Cebu2World Development Inc.nga dili patas-an ang abangan sa mga vendors sa Carbon Public Market hangtud na sa tuig 2028, bunga sa tambag sa ilang giingong psychologist sa ilang team.
Gikabutyag niya nga usa sa mga presyur karon kay nakasentro sa abangan sa mga manindahay, hinungdan nga nituo siya kabahin sa gisaad sa Cebu2World Development Inc.
Mao kini ang nahimong pamahayag ni Gok-ong atol sa ekslusibong pakighinabi sa Bombo Radyo Cebu newsteam kaniya, diin iyang gidugang nga sa ordinansa sa bag-ong market code nga nipasar sa balaod sa Dakbayan sa Sugbo niadtong Oktobre 2023, klaro ug tataw na nga ang abangan sa mga vendors sa kamerkadohan sa Carbon Market, sa 2026 nagkantidad og 21 pesos, samtang sa 2025 nagkantidad og 18 pesos.
Dugang panglantaw ni Gok-ong, agwantahon nalang sa Cebu2World Development Inc ang 3 ka tuig nga dili mopasaka sa abangan apan, aduna siyay pangutana nga unsa ang mahitabo human sa 2028 kung ang merkado publiko, pribado na.
Gani, iyang gidugang nga mao nana ang hugna nga mosaka na ang mga bayrunon dili lang ang sa abangan, apan lakip na usab ang mga entrance fees, gumikan kay ang market code nga nipasar niadtong 2023 nga gihangyo sa Megawide sa Dakbayan sa Sugbo, ang City Ordinance 2719, nag ingun nga ang mga baligyaon nga mosulod sa Carbon, pangayuan na og buhis.
