CEBU CITY- Nag abot si Cebu City Councilor Dave Tumulak, chairman sa Committee on Budget sa City Council, ug si Executive Secretary Ralph Recto didto sa kaulohan niadtong Marso 5, aron magtagbo sa usa ka meeting nga nagtumong sa paghisgut sa usa sa mga dakong problema nga gi atubang karon sa dakbayan sa Sugbo— ang basura.
Giasoy ni Tumulak nga lakip sa nahisgutan sa maong panagtagbo mao nga ang Department of Environment and Natural Resources (DENR) moluwat og tabang sa gisagubang nga problema karon sa Sugbo, subay ra usab sa katuyoan sa pag-adto ni Tumulak nga ang pagpangayo og tabang sa National Government, kung asa ang posibleng luna nga pwede labayan sa toneladang basura, ug ingun man matabangan sa pinansyal nga aspeto.
Mao kini ang gikabutyag ni Tumulak sa usa ka eksklusibong pakighinabi sa Bombo Radyo Cebu newsteam kaniya, diin iyang gidugang nga lakip sa katuyoan sa presensya niya didto sa kaulohan mao usab ang pagpangayo og tabang aron adunay mas hugot nga lakang sa pagpatuman sa balaod kabalot sa pagprotihir sa kinaiyahan.
Samtang, gikabutyag usab ni Tumulak nga aduna siyay nasayran gikan ni Sec. Recto nga adunay mga programa nga i-download sa dakbayan sa Sugbo, ug iya na usab kining gikataho ni Cebu City Mayor Nestor Archival human sa panagstoryahanay nila ni Sec. Recto.
Lakip sa nahisgutang programa mao ang pag-abot sa mga bugas nga barato sa dakbayan sa Sugbo, ingun man mga infrastructure projects.
Kini ang nahipos nga mga impormasyon ni Tumulak, kinsa iyang gikonsiderar nga “good news” alang sa Dakbayan sa Sugbo.
