Nasakmit sa Ahmedabad Municipal Corporation (AMC) ang Guinness World Record title nga “Largest Flower Bouquet” human nila gihimo ang pinakadakong flower bouquet sa tibook kalibutan niadtong Enero 7, 2025.
Gitawag kini nga “Unity Blossom” ang higanteng buquet nga adunay katas-on nga 33feet og kalapdon nga 10.844 metros.
Gihimo kini pinaagi sa 11,700 ka mga buhi nga buwak nga chrysanthemum.
Gibida ang maong higanteng installation isip kabahin sa tinuig nga Ahmedabad International Flower Show sa Sabarmati Riverfront, nga nagtumong nga magsalamin sa abundang kultura, mitolohiya, ug padayon nga paglambo sa India.
Tungod sa talagsaong kaanindot og kadako niini, miabot sa kapin 158-mil ka turista ug lokal nga residente ang midagsa sa unang tulo ka adlaw sa exhibit.
Sumala sa mga residente, hilabihan nilang gikalipay ang tema niining nakapokus sa relihiyon ug kultura nga nagpakita sa panaghiusa bisan paman sa kalahian.
