Giandam karon ang dugang mga kaso nga ipasaka kalabot sa anomaliya sa pagkontrol sa baha.
Sa usa ka interbyu, gipahibalo ni Ombudsman Jesus Crispin Remulla nga adunay lima hangtod unom pa ka mga kaso nga gikatakdang ipasaka sulod sa duha ka semana. Wala siya maghatag og dugang detalye bahin niini.
Gikumpirma usab sa Ombudsman nga ang kanhi House Speaker Martin Romualdez mao ang magbabalaod nga gi-isyuhan og freeze order.
Niadtong Biyernes, ang Anti-Money Laundering Council (AMLC) nagtaho nga nakakuha kini og freeze order gikan sa Court of Appeals (CA) batok sa mga kabtangan sa usa ka wala nganli nga magbabalaod nga giingong nalambigit sa iskandalo sa korapsyon sa flood control projects.
Ang freeze order sa korte naglangkob sa 25 ka bank accounts sa maong magbabalaod ug 10 ka insurance policies nga narehistro ubos sa iyang ngalan.
Kabahin kini sa nagpadayon nga imbestigasyon sa mga anomaliya nga proyekto sa pagkontrol sa baha sa gobyerno.
Samtang, gipahibalo usab sa Ombudsman nga ang kasamtangang kaso ubos sa pasiunang imbestigasyon ug giingon nga gisunod ang hustong proseso, tungod kay ang ilang mga kontra mga opisyal sa gobyerno nga adunay daghang kwarta ug gahum.
