Gisang-at ni Atty. Manases “Mans” Carpio ang mga kasong kriminal sa Quezon City Prosecutor’s Office batok kang Bangko Sentral ng Pilipinas (BSP) Governor Eli Remolona Jr., Anti-Money Laundering Council (AMLC) Executive Director Ronel Buenaventura, ug pipila ka miyembro sa House Committee on Justice, lakip na sila si Rep. Gerville Luistro, Chel Diokno, Leila De Lima ug si Akbayan Party-list Rep. Percival “Percy” Cendaña.
Ang reklamo, nga gisang-at niadtong Lunes sa buntag, Abril 27, 2026, naggikan sa giingong ilegal nga pagbutyag sa mga rekord sa bangko nga nalambigit kang Atty. Carpio ug Bise Presidente Duterte atol sa usa ka hearing sa House committee sa mga reklamo sa impeachment nga gihimo niadtong Abril 23, 2026.
Subay niini, eksklusibong gikuha sa Bombo Radyo Cebu news team ang habig ni Cendaña, aron sutaon ang iyahang reaksyon subay sa pagkalakip niini sa maong kaso nga gisang-at ni Atty Carpio.
Matod ni Cendaña, wala na sya nakugang nga moabot na usab sa korte ang mga Duterte tungod kay matod niya, mao kini ang naandan sa mga Duterte sa higayon nga mangasakpan sa mga binuhatan, modangop dayun sa korte.
Gidugang niini, nga sayang ra ang oras ug panahon gumikan kay nasayud naman ang tanan nga sa katapusan, exempted sa Bank Secrecy Law ang impeachment process busa, kining pagpasaka og kaso ni Carpio kanila nagsubay lang sa pagkabisto sa maong pamilya ug “mema’ nalang.
Gitino usab niini, taliwala sa mga pamahayag nga gipakatap sa Duterte Diehard Supporters (DDS) nga angayan mahadlok ang mga gipasakaan og kaso ni Atty. Carpio, giklaro ni Cendaña nga walay angay nga kahadlokan bahin niini. Kini gumikan kay ang
miyembro sa House Committee on Justice ug uban pa, anaa sa legal nga bahin sa balaod.
Gani, gisubli niini nga walay gilapas nga balaodnon ang House Committee on Justice sa paghangyo niini sa report of suspicious and covered transactions sa Anti-Money Laundering Council (AMLC).
Busa, alang kang Cendaña, “desperate move” kining gihimong lakang karon sa habig sa Duterte para lang ingnun nga aduna kini tubag sa mga reklamong giatubang. Dugang pa niya, kung mabantayan sa kadaghanan, dili motubag ang mga Duterte sa Committee on Justice, hinuon kusog kining moatubang ug motubag sa media o sa korte.
Samtang, gikabutyag ni Cendaña nga mapasalamaton sila kang Atty. Carpio sa pagsang-at niini og kaso batok kanila kini gumikan kay ma-konsiderar kini nga gikompirmar niini ang tanang nayagyag nga impormasyon sa nilabayng Committee on Justice hearing sa hisgutanan na sa suspicious and covered transactions sa mga bank accounts nga iya sa mga Duterte.
Gihimug-atan pa ni Cendaña, “palibhasa guilty” ug nasayud ang mga Duterte sa mga nabutyag nga transaksyon hinungdan nga ingun ani ang nahimong reaksyon ug uradang midangop sa korte.
