CEBU, PHILIPPINES- Gipasidunggan sa National Organizing Committee (NOC) ang mga local government units (LGUs), kaubang ahensya sa gobyerno, ug nagkadaiyang stakeholders tungod sa ilang kontribusyon sa malampusong pag-host sa ika-48 nga ASEAN Summit-related events sa Cebu.
Gipahigayon ang appreciation event niadtong Mayo 9 sa Shangri-La Mactan, diin giila ang hiniusang paningkamot sa mga ahensya sa gobyerno, security forces, organizers, ug lokal nga liderato aron masiguro ang hapsay ug luwas nga pagpahigayon sa ASEAN-related activities.
Mipadayag og pasalamat sila ASEAN 2026 Operations Head Ma. Hellen B. De La Vega ug NOC representative Leonardo Roy A. Cervantes ngadto sa tanang kaabag sa maong kalihokan, ilabi na kang Cebu Governor Pamela S. Baricuatro, nga nangulo sa Cebu Organizing Committee.
Sa usa ka narekord nga mensahe, si Ferdinand Marcos Jr. mipasabot sa iyang pagpasalamat sa mga ahensya sa gobyerno, mga pwersa sa seguridad, LGUs, ug mga boluntaryo nga mitampo sa kalampusan sa summit.
Gidayeg usab niya ang Cebu sa episyenteng pagdumala sa maong kalihokan bisan pa sa mga hagit ug kausaban sa iskedyul.
Samtang, mipasalamat si Governor Baricuatro sa Presidente sa pagsalig sa Cebu isip host sa mahinungdanong ASEAN events. Matud pa niya, ang kalampusan sa summit resulta sa koordinado ug kolektibong paningkamot sa tanang sektor.
Dugang pa sa gobernador, ang maong kalihokan nagpakita sa “katahom, kalig-on, ug propesyonalismo sa Cebu,” nga iyang gihulagway nga usa ka “gipaambit nga kalampusan alang sa Cebu ug sa tibuok nasod.”
