CEBU CITY- Gibutyag ni Atty. Rameses Villagonzalo, usa ka criminal law expert ug ICC-accredited lawyer, nga posible gihapong nakalapas sa Republic Act No. 11053 o ang Amended Anti-Hazing Act of 2018 ang nahitabo nga team-building activity sa Dipaculao, Aurora, diin namatay ang duha ka players sa Ateneo de Manila University nga sila si Divine Adili ug Rene Baterbonia.
Matud niya, bisan walay pormal nga fraternity o sorority ang grupo nga nagpahigayon sa aktibidad, mahimo gihapon kining masakop sa Anti-Hazing Law kon mapamatud-an nga anaa ang mga elemento nga gilatid sa balaod.
Base sa imbestigasyon sa Criminal Investigation and Detection Group (CIDG), giingong ang gipahigayon nga team-building training nakahatag ug physical ug emotional distress sa mga players, nga maoy usa sa mga importante nga elemento nga giila sa balaod sa pagdeterminar kung adunay hazing nga nahitabo.
Gipasabot usab ni Atty. Villagonzalo nga wala pa hingpit makasuhan ang mga respondents sa insidente tungod kay rekomendasyon pa lamang kini gikan sa CIDG. Ang pinal nga mga kaso nga ipasaka magdepende gihapon sa ebalwasyon ug desisyon sa public prosecutor nga nagdumala sa imbestigasyon.
Dugang pa niya, posible usab nga mapasakaan ug kasong kriminal si ADMU head coach Tab Baldwin kon makakita ang prosekyusyon ug lig-on nga prima facie nga ebidensya nga maglambigit kaniya sa maong insidente.
Kon adunay ipasakang kaso, posible usab nga maapektuhan ang iyang mga pribilehiyo isip langyaw, lakip na ang iyang passport ug working permit, depende sa mga mando sa korte ug sa may kalabutan nga mga ahensya sa gobyerno.
Sumala pa sa abogado, posible usab nga mapasakaan ug kasong criminal negligence ang pipila ka opisyal sa Ateneo de Manila University kon mapamatud-an nga adunay kakulang sa pagdumala o pagpanalipod sa mga estudyante.
Bisan pa man nga gilimod sa pamunuan sa unibersidad ang kahibalo sa nahitabo nga team-building activity sa Dipaculao, Aurora niadtong Hunyo 8, ang ilang posibleng responsibilidad magdepende gihapon sa resulta sa opisyal nga imbestigasyon ug sa mga ebidensyang ipresentar sa prosekyusyon.
