Mipirma ang Cebu Provincial Government ug Municipality of Pinamungajan, Cebu og usa ka Deed of Usufruct alang sa pagtukod ug pagpaayo sa mga importanteng pasilidad sa Lamac Elementary School, lakip ang usa ka covered court ug usa ka two-storey, upat ka classroom nga smart school building.
Ang maong kasabotan gipirmahan gahapong adlawa, Lunes, Agosto 17, nila ni Cebu Gov. Pamela Baricuatro ug Pinamungajan Mayor Glenn Baricuatro, atol sa pagbisita sa gobernadora sa maong munasipalidad alang sa Serbisyo Karaban sa Kapitolyo.
Mitambong usab sa maong pirmahay sila si Pinamungajan Vice Mayor Jessica Baricuatro, Capitol Agriculture Consultant Gigi Sanchez, kanhi Third District Board Member Jiembo Borgonia, ug uban pang mga opisyal sa munisipyo ug probinsya.
Ubos sa gipirmahang kasabotan, ang gobyerno sa probinsya adunay usufruct sa duha ka bahin sa property sa munisipyo nga mokabat sa 1,026 square meters alang sa pagpalambo, operasyon, pagmentinar, ug pagpaayo sa mga pasilidad sa eskwelahan.
Sa maong kantidad, 576 square meters ang gamiton para sa pagtukod og covered court o gymnasium lakip na ang mga kinahanglanon nga pasilidad niini, samtang 450 square meters ang igahin para sa duha ka andana nga smart school building.
Ang maong proyekto gituyo aron mahatagan ang mga estudyante ug magtutudlo og mas luwas ug mas maayong palibot alang sa pagkat-on, samtang magamit usab ang mga pasilidad para sa mga kalihokan sa eskwelahan ug komunidad.
Sa usa ka pampublikong tigum, gipasalig ni Governor Baricuatro ang padayong suporta ug pagtabang sa lalawigan alang sa pagpalambo sa Pinamungajan pinaagi sa paghatag og mga pundo sa nagkadaiyang proyekto ug pagsaulog.
Lakip sa mga nag-unang pundo nga iyang gipahibalo mao ang P3 milyon para sa umaabot nga Charter Day sa lungsod karong Septiyembre 4, ug P2 milyon para sa pagtukod ug pagpaayo sa ilang public library, samtang ang ubang mga hangyo gikan sa lokal nga gobyerno nasulbad usab pinaagi sa kolaborasyon ni Mayor Glenn.
Gidapit usab sa gobernadora ang mga residente nga mopahimulos sa mga libreng serbisyo gikan sa probinsya ug gipahayag ang iyang espesyal nga pagdugtong sa lungsod, diin iyang gipasiugda nga “there’s no place like home” ug kanunay siyang makakita og oras nga mobisita ug motabang sa iyang pinalanggang lungsod.
