Nakadaog og duha ka medalya ang usa ka miyembro sa Philippine National Police (PNP) atol sa iyang pag-apil sa internasyonal nga kompetisyon sa Muay Thai sa Thailand.
Si Police Corporal Jonard E. Apa-an sa PNP Anti-Cybercrime Group nakadaog og silver medal sa 51-kilogram Muay Thai Combat Category.
Nakakuha usab siya og bronze medal sa Wai Kru Singles event atol sa Siamyout Global Heritage Muay Thai Series 2026 nga gipahigayon sa Samut Songkhram, Thailand, gikan Agosto 10 hangtod 12.
Gipahalipayan ni Chief PNP Police General Jose Melencio C. Nartatez Jr. si Apa-an tungod sa iyang maayong performance ug sa pagrepresentar sa PNP ug sa nasud sa internasyonal nga kompetisyon.
Matod ni Nartatez, padayon nga gisuportahan sa PNP ang mga police personnel nga adunay talagsaong talento ug abilidad sa sports ug uban pang natad.
Gipasidunggan usab sa PNP ang kalampusan ni Apa-an isip usa ka ehemplo sa disiplina, dedikasyon ug pagpaningkamot sa pagrepresentar sa organisasyon ug sa Pilipinas sa internasyonal nga entablado.
