TALISAY CITY, CEBU- Gironda sa Philippine Drug Enforcement Agency Region 7 (PDEA-7), uban sa Talisay City Police, ang usa ka giingong drug den nga gituohang gidumala sa usa ka construction worker ug kanhing drug offender sa Sitio San Miguel, Barangay Linao, Talisay City, pasado alas 9:40 sa gabii niadtong Biyernes, Agosto 21, 2026.
Giila sa mga awtoridad ang pangunang target sa operasyon nga si alyas “McLin,” 56 anyos, residente sa Barangay Linao. Nadakpan siya atol sa buy-bust operation nga gihimo sa mga awtoridad.
Nadakpan usab ang duha ka lalaki nga giingong nasakpan sulod sa drug den samtang naggamit og gidudahang ilegal nga droga. Giila sila nga si alyas “Ben,” 34 anyos, ug si alyas “Mark,” 37 anyos, nga parehong construction worker ug residente sa Barangay Linao.
Nasakmit sa operasyon ang lima ka sachet sa gidudahang ilegal nga droga nga adunay kinatibuk-ang gibug-aton nga 11.12 gramos ug gibanabanang standard price nga ₱75,616. Nakuha usab sa mga awtoridad ang buy-bust money ug nagkalain-laing drug paraphernalia.
Ang mga suspek anaa karon sa kustodiya sa PDEA-7, samtang ang mga nakumpiskang ebidensya gisumiter sa PDEA-7 Regional Office Laboratory alang sa tukmang eksaminasyon.
Matod ni Leia Alcantara, information officer sa PDEA-7, migugol ang mga awtoridad og usa ka semana sa pagpalig-on sa kaso batok kang McLin human makadawat og impormasyon gikan sa usa ka nagpakabana nga residente sa lugar.
Sumala sa mga imbestigador, giingong namaligya si McLin og mokabat sa 10 gramos nga ilegal nga droga matag semana. Gituohang adunay usa ka tinubdan nga nagsuplay sa maong droga, nga giingong gigamit usab sulod sa drug den isip kabahin sa bayad.
Nasayran usab nga nadakpan na kaniadto si McLin niadtong 2019 sa Cebu Police Provincial Office tungod sa susamang kaso nga may kalabotan sa ilegal nga droga. Sa ulahi, gibuhian siya human sa usa ka plea bargain.
