PROVINCE OF CEBU- Nagdeklara ang Provincial Government sa Bohol og dengue outbreak sa tibuok probinsya tungod sa padayong pagsaka sa mga kaso ug namatay nga may kalabotan sa sakit.
Gipagawas ni Bohol Governador Erico Aristotle Aumentado ang deklarasyon gabaie Huwebes, Agosto 27, human nakatala ang mga awtoridad og 1,883 ka kaso sa dengue ug 21 ka namatay gikan Enero 4 hangtod Agosto 22, 2026.
Milapas ang Bohol sa dengue epidemic threshold sulod sa tulo ka sunod-sunod nga semana, uban sa case fatality rate nga 1.12 porsyento.
Lakip sa mga lugar nga nakatala og daghang kaso ang Talibon, Tagbilaran City, Ubay, Getafe, ug Tubigon.
Tungod sa outbreak, gimandoan ang pagpakusog sa mga lakang batok sa dengue, lakip ang 4S Strategy, pagpaaktibo sa mga lokal nga dengue task force, ug pagpatuman sa Aksyon Barangay Kontra Dengue.
Gimandoan usab ang mga lokal nga gobyerno nga palihokon ang mga panimalay, eskwelahan, ug komunidad sa “Search and Destroy” batok sa mga breeding sites sa lamok.
Samtang, gimandoan ang mga health office ug ospital sa pagtukod og Dengue Fast Lanes aron mapadali ang konsultasyon ug pagtambal sa mga pasyente.
Tukuron pag-usab ug palig-onon ang Bohol Provincial Anti-Dengue Task Force isip kabahin sa koordinadong tubag sa dengue outbreak.
