Nagpadayon ang case-building sa Office of the Ombudsman batok sa kanhi House Speaker nga si Martin Romualdez bahin sa gidudahang kickback scheme sa mga flood control project, diin miabot na sa 42 ang ilang kinatibuk-ang testigo.
Sumala ni Assistant Ombudsman Mico Clavano, naglakip kini sa 28 ka bag-ong mga testigo ug 14 ka kanhi bodyguard ni kanhi Ako Bicol Rep. Zaldy Co.
Giklaro ni Clavano nga mas gihatagan nila og bili ang kalidad ug pagkaangay sa mga pamahayag kay sa gidaghanon sa testigo, ug bisan pa man sa pag-bakwi sa pipila sa ilang unang affidavit, dili kini basta-basta nga makatago sa matuod nga nahitabo apan makadugang pa gani og mga pangutana batok sa akusado.
Gikumpirma usab sa Ombudsman nga naapil sa gihimong fact-finding probe alang sa grand conspiracy silang kanhi Presidential Legislative Liaison Office chief Adrian Bersamin ug kanhi DepEd Undersecretary Trygve Olaivar human sila itudlo sa state witness nga si kanhi DPWH Undersecretary Roberto Bernardo.
Gilauman nga human sa Agosto 31 ang deadline sa pagsumite og reply sa panel ngadto sa supplemental counter-affidavit ni Romualdez masumite na ang kaso alang sa resolusyon sulod sa 10 hangtod 15 ka adlaw.
Sa pikas nga bahin, gihimakak ni Romualdez ang mga alegasyon ug giingong handa siyang mopaubos sa legal nga proseso aron pamatud-an ang iyang kalimpyo.
Agi og tubag sa pamahayag ni Davao City Rep. Paolo “Pulong” Duterte nga nahuman ang mga proyekto sa iyang distrito, gipatin-aw ni Clavano nga ang pagkahuman sa proyekto dili awtomatikong nagpasabot nga walay anomaliya tungod sa posibleng usab sa specifications.”
Dugang pa niini, gipasabot sa opisina nga nagsang-at usab sila og mosyon alang sa inhibition batok kang Associate Justice Ronald Moreno tungod sa mga alegasyon sa pagka-insistente nga gipakita sa huwes, nga naghatag og pagduhaduha sa iyang integridad sa pagdumala niining mga kaso.
