Giklaro sa Malacañang nga si Presidente Ferdinand Marcos Jr. wala magpabaya sa iyang mga katungdanan kung mogahin siya og panahon alang sa iyang pamilya.
Kini ang gipahayag ni Presidential Communications Undersecretary Claire Castro human sa pagkaylap sa usa ka video diin makita ang Presidente nga nagkanta atol sa selebrasyon sa adlawng natawhan sa iyang inahan, nga si First Lady Emeritus Imelda Marcos.
Sumala ni Castro, ang Presidente nagpadayon sa pagtuman sa iyang mga responsibilidad bisan kung aduna siyay panahon sa iyang pamilya.
Gipasalig usab ni Castro nga ang Presidente nagpadayon sa pagmonitor sa sitwasyon sa nasud ug naghatag og mga direktiba sa mga ahensya sa gobyerno, labi na sa mga lugar nga naapektuhan sa kusog nga ulan.
Gidugang ni Castro nga ang Presidente nagmando ug nagpahinumdom sa mga ahensya sa gobyerno nga motubag dayon sa mga panginahanglan sa mga Pilipino nga naapektuhan sa grabe nga panahon.
Gipasiugda sa Malacañang nga ang panahon sa Presidente alang sa iyang pamilya wala magpasabot nga mohunong na siya sa iyang mga katungdanan isip pangulo sa nasud.
