Gipahingusgan sa kapulisan ang pagpatuman sa curfew sa mga menor de edad human adunay natala nga mga insidente nga nalambigit kanila sa pipila ka lugar sa dakbayan.
Matud ni Police Colonel Gerard Ace Pelare, Deputy Director for Operations sa Cebu City Police Office, gipalig-on sa kapulisan ang ilang pagpatrolya ilabina sa mga lugar diin kasagarang makita ang mga menor de edad sa panahon sa curfew.
Apan giklaro ni Pelare nga dili pa angay nga ikonsiderar nga alarming ang sitwasyon tungod kay dili man kanunay mahitabo ang maong mga insidente.
Dugang niini nga giimbistigahan na usab ang duha ka insidente nga nalambigit sa mga menor de edad ug gipatawag na usab ang mga kabatan-onan uban sa ilang mga ginikanan.
Gipasabot usab ni Pelare nga lahi ang proseso kung menor de edad ang nalambigit sa usa ka insidente tungod kinahanglan nga sundon ang mga probisyon ubos sa balaod alang sa mga kabataan nga nalambigit sa kaso.
Gihimug-atan usab sa otoridad nga ang mga menor de edad nga makit-an sa susamang sitwasyon dili dayon isipon nga gi-aresto, kondili gi-rescue ug gitabangan nga maprotektahan, subay sa hustong proseso.
Kabahin usab kini sa mga programa sa kapulisan aron mapamenos ang mga insidente nga mahimong malambigit ang mga menor de edad.
Apan alang kang Pelare, dili lamang kapulisan ang makasulbad niini nga problema. Busa, iyang gipasiugda nga kinahanglan ang whole-community approach, diin apil ang pamilya, mga paryente, barangay ug ang kapulisan sa pagmonitor ug paggiya sa mga kabataan. via Bombo Jemm Mayot
