Gipahibalo ni U.S. Secretary of State Marco Rubio ang pagpatuman sa mga silot o sanctions batok sa International Criminal Court (ICC).
Matod ni Rubio, dili tugotan ni U.S. President Donald Trump nga husayon ang mga Amerikano sa usa ka korte nga giisip nilang dili lehitimo.
Tumong sa maong mga silot nga babagan ang mga transaksyon ug limitahan ang mga kahinguhaan ug kapasidad sa ICC sa pagtuman sa mga buluhaton niini.
Dugang pa ni Rubio, gipatuman ang mga silot aron hatagan og higayon ang ICC ug ang mga miyembrong nasud niini nga sulbaron ang mga reklamo sa Estados Unidos.
Gisupak usab sa Washington ang imbestigasyon sa ICC bahin sa mga aksyon sa mga tropang Amerikano sa Afghanistan.
Una nang gisaway sa U.S. ang pagpagawas sa ICC og mga warrant of arrest batok kang Israeli Prime Minister Benjamin Netanyahu ug kanhi Israeli Defense Minister Yoav Gallant, kalabot sa giingong mga krimen sa gubat sa Gaza.
Sa miaging mga lakang, nagpahamtang na ang U.S. og sanctions batok sa mga maghuhukom ug opisyal sa ICC tungod sa mga aksyon sa korte nga gisupak sa administrasyong Trump.
