Mandato sa Korte ang rason sa kausab sa pagtambong ni Kanhi Presidente Rodrigo “Roa” Duterte sa mga pagdungog o hearing niini sa International Criminal Court (ICC).
Sumala ni Atty. Rameses Victorius Gatchalian Villagonzalo, ICC accredited lawyer, sa panahon sa Pre-Trial Chamber, adunay katungod ang akusado nga magsumite og waiver o dili pagtambong tungod kay ang gihisgutan preliminary matters pa lamang ug wala pa nagsugod ang mismong trial proper.
Nadawat ug gitugotan man sa korte ang maong waiver kaniadto, apan sa Trial Chamber, gipahayag sa abogado nga gi-mandato na gayud sa mga huwes nga kinahanglang personal nga motambong sa korte ang kanhi presidente, hinungdan nga wala na kini choice kundi ang pag-atubang sa pagdungog.
Gipunting usab niini nga dili lisud ang pagtambong tungod kay ang pasilidad sa detention facility o prisuhan nahimutang lang mismo sa luyo sa korte sulod sa usa ka dako nga compound sa ICC.
Gipasiugda usab ni Atty. Villagonzalo nga maayo ug paspas ang pagkaayo sa kanhi presidente. Dugang pa, nakahimo ang kanhi presidente sa pagpakig-alayon sa iyang legal team bahin sa pagpadali sa pagproseso sa daghang mga dokumento—ilabi na sa pagsulbad sa mga sitwasyon diin adunay mga panid nga posibleng kulang sa pipila ka mga file.
Busa, basi sa iyang mga obserbasyon, anaa sa maayong kondisyon ang panglawas sa kanhi presidente ug daw dili kini masakiton tan-awon, usa ka detalye nga naghatag og paglaom ug kalipay sa iyang mga paryente ug mga tigpaluyo.
