Nanawagan si Education Secretary Sonny Angara sa Senado nga ibalik ug dugangan ang badyet sa Department of Education (DepEd) alang sa sunod tuig, ilabi na sa mga programa para sa pagkat-on sa mga estudyante, kaayohan sa mga magtutudlo, ug pagpaayo sa mga pasilidad sa mga eskwelahan.
Atol sa deliberasyon sa Senate Finance Committee niadtong Biyernes, Oktubre 16, nangayo ang DepEd og dugang P147.93 bilyones aron mapondohan ang mga programa ug serbisyo nga wala hingpit nga nasakop sa gisugyot nga nasudnong badyet.
Ubos sa General Appropriations Bill (GAB), mokabat sa P969.79 bilyones ang alokasyon alang sa DepEd ug sa mga ahensya nga ubos niini.
Mas ubos kini og P147.93 bilyones kon itandi sa orihinal nga gisugyot ubos sa National Expenditure Program (NEP).
Atol sa diskusyon, gisugyot usab ang laing alokasyon alang sa maong mga programa aron masiguro ang transparency sa pag-apod-apod ug paggamit sa pondo.
Giaprobahan sa Senate Finance Committee ang gisugyot nga badyet sa DepEd, apan ubos sa pipila ka kondisyon, lakip ang dugang nga mga diskusyon ug pagsumite sa gikinahanglang mga dokumento.
Padayon ang panawagan sa DepEd alang sa suporta sa mga senador aron matubag ang kakulangon sa pondo ug mapatuman ang mga programa alang sa pagpauswag sa kalidad sa edukasyon sa nasud.
