Gipasiugda sa Korte Suprema nga mahimong magpahigayon og imbestigasyon ang Office of the Ombudsman sa mga alegasyon sa korapsyon nga dili na kinahanglan maghulat sa resulta sa audit sa Commission on Audit (COA).
Matod sa Korte, mahimong magsugod og imbestigasyon ang Ombudsman bisan pa og nagpahigayon usab ang COA og lahi nga pagsusi sa samang isyu o transaksyon.
Gipahayag kini sa desisyon nga gisulat ni Supreme Court Associate Justice Maria Filomena Singh, diin gipamatud-an sa Court En Banc ang tulubagon sa pipila ka opisyal ug kanhi empleyado sa Provincial Government sa Palawan kalabot sa mga iregularidad sa paggamit sa P2.572 bilyon gikan sa Malampaya Fund.
Hapit P1 bilyon sa maong pondo ang gigahin alang sa mga proyekto sa kuryente, panglawas, edukasyon ug imprastraktura.
Human sa espesyal nga audit sa COA, upat ka administratibong reklamo ang gisang-at sa Ombudsman tungod sa mga iregularidad sa procurement ug pagpatuman sa mga proyekto.
Nakaplagan sa Ombudsman nga adunay tulubagon ang mga akusado sa grave misconduct, serious dishonesty ug gross neglect of duty.
Gipamatud-an usab sa Court of Appeals ang maong desisyon.
Gihagit sa mga akusado ang desisyon sa Korte Suprema, nga nangatarongan nga sayo ra ang imbestigasyon tungod kay wala pa mahuman ang audit sa COA.
Apan, gipasiugda sa Korte nga managlahi ug independente ang mga gahom ug mandato sa Ombudsman ug COA.
Busa, dili kinahanglan nga maghulat una ang Ombudsman sa pagkompleto sa audit aron makasugod og imbestigasyon.
