Gipasiugda ni Ombudsman Jesus Crispin “Boying” Remulla ang panginahanglan sa mas lapad nga transparensiya sa mga transaksiyon sa gobyerno ug mas lig-on nga pagpanubag sa mga opisyal nga nalambigit sa posibleng korapsyon.
Kini ang mga nag-unang baruganan nga may kalabotan sa iyang kampanya batok sa korapsiyon, samtang mitambong siya sa usa ka town hall meeting kauban ang mga miyembro sa Cebu business community sa Dakbayan sa Sugbo.
Lakip sa mitambong sa maong kalihokan ang mga representante sa Cebu Chamber of Commerce and Industry.
Gipahayag sa opisyal nga dako ang gipakitang kalamboan ug kaayohan human sa ilang gipahigayong tigom uban sa mga negosyante sa Sugbo.
Sumala sa opisyal, ang pagtabang ug pagsuporta sa mga negosyante mahinungdanon kaayo aron mapalambo ang ekonomiya ug makahimo og dugang mga trabaho alang sa katawhan. Gipasiugda niini nga kon lisud-lisuron sa gobyerno ang mga negosyante, ang katawhan gihapon ang mag-antos. Gipunting usab sa opisyal ang mga kabalaka ug reklamo bahin sa kakuhit sa pagroseso ug mga requirement sa mga opisina sa gobyerno.
Gipahayag niini nga aron malikayan ang pang-abuso sa gahum, corruption, ug pagbutang sa mga fixer, kinahanglan nga i-online o i-digitalize ang kadaghanang proseso sa pagkuha og mga permit ug lisensya. Dugang pa niana, gibutyag sa opisyal nga dili lang puros pangkasuhan o pagpriso sa mga nakalapas ang tumong sa ilang buhatan, kon dili ang pagsiguro usab nga mas dali ug hapsay ang pagpalaganap sa negosyo ug pagdagan sa nasud.
Mipasalig kini nga magpadayon ang ilang komunikasyon ug dayalogo uban sa mga sector sa negosyo. via Bombo George Lastimosa
