CEBU CITY- Mipasalig si Cebu City Mayor Nestor Archival nga adunay mga hinabang nga ihatag ngadto sa mga residente nga naapektuhan sa sunog sa Sitio Buli, Brgy. Kamputhaw, Cebu City, gahapon, Nobyembre 17, 2026.
Diin mipasalig ang mayor nga makatukod pagbalik ang mga residente sa ilang mga panimalay, hilabi na nga anaa sa 93-1 lot ang yuta sa mga nasunogan.
Mipahimangno usab si Archival sa publiko nga magmatngon kanunay sa mga posibleng makamugna og sunog panahon sa El Niño phenomenon, sama sa mga faulty wirings ug butane stoves, aron makalikay sa katalagman.
Sa pikas bahin, masulub-on nga gipaambit ni Nanay Rosario Tarongoy, 81 anyos, ang pagkamatay sa ilang tulo ka binuhi nga iring atol sa sunog nga miigo gahapon sa maong lugar.
Sa pakighinabi sa Bombo Newsteam, gibutyag ni Nanay Rosario nga bisan pa man sa mga nahitabo, nagpabilin gihapon sila nga lig-on aron atubangon ang mga hagit sa kinabuhi.
Matod pa ni Nanay Rosario, mapasalamaton gihapon siya nga walay nakalas sa iyang pamilya atol sa maong alarma.
Dugang niini, sunod-sunod ang mga pagsulay nga miabot sa iyang kinabuhi karong tuiga—diin naoperahan pa siya, bag-ohay lang namatay ang iyang bana niadtong Setyembre, ug kagahapon naapil sa pagkaugdaw ang iyang balay ug mga binuhing iring. Bisan pa niini, wala gihapon nawad-an og paglaom si Nanay Rosario.
Alang kaniya, aduna gihapoy rason aron magpakabuhi ug magsaulog karong umaabot nga Pasko.











