-- ADVERTISEMENT --

CEBU CITY- Nagpadayon sa pagsuta ang Commission on Human Rights (CHR)-7 sa mga nahitabong insidente atol sa rally sa Cebu City, ilabina sa komosyon nga nalambigit ang pipila ka sakop sa kapulisan ug mga mga raliyista.

Sa pakighinabi sa Bombo Newsteam kang CHR-7 Regional Director Atty. Arvin Odron, gipasabot niini nga importante nga mapanalipdan ang katungod sa mga raliyista sa malinawon nga pagpundok ug pagpahayag sa ilang mga opinyon, lakip na ang kagawasan sa mga mamamahayag sa pagreport sa mga panghitabo.

Gipasabot ni Odron nga obligasyon sa gobyerno ug sa mga law enforcement agencies ang pagrespeto ug pagpanalipod sa maong mga katungod, ilabina kon adunay mga grupo nga nagpahibalo sa ilang pagsupak o pagkadiskontento sa mga polisiya sa gobyerno.

Giklaro usab niini nga dili hingpit ang tanang katungod, diin ang mga rally kinahanglan magpabiling malinawon ug mosunod sa mga lagda sa pagpahigayon og public assembly.

Samtang, gibutyag ni Udrón nga nagpakatap ang CHR og monitoring teams sa nagkalainlaing lugar atol sa rally aron makatigom og impormasyon ug matino kon adunay nahitabong paglapas sa tawhanong katungod.

-- ADVERTISEMENT --

Sa pagkakaron, wala pa’y nadawat nga report ang CHR-7 Regional Office kalabot sa alegasyon sa arbitrary arrest o kapintasan nga gihimo sa kapulisan atol sa maong kalihokan.

Gipasalig ni Odrón nga kon adunay mapamatud-ang paglapas sa tawhanong katungod, magpagawas ang komisyon og findings ug iendorso ang mga resulta ngadto sa angay nga ahensya alang sa tukmang aksyon.

Gipasabot niya nga lahi ang terminolohiya nga gigamit sa CHR sa paghulagway sa mga paglapas sa katungod, sama sa arbitrary deprivation of life ug arbitrary deprivation of freedom, nga lahi usab sa mga kriminal nga kaso sama sa murder o homicide nga sakop sa imbestigasyon ug pagpasaka og kaso sa mga may awtoridad.