CEBU CITY-Gipaambit sa Archdiocese of Cebu ang ilang mga plano sa Jubilee Year 2025 nga selebrasyon nga nakasentro sa tema nga “Pilgrims of Hope.”
Diin pormal nga ablihan sa Archdiocese ang selebrasyon karong Disyembre 29, dungan sa mga gidestino nga mga dagkong simbahan sa Sugbo diin gilauman nga mokabat sa kapin 10,000 ka mga Pilgrims ang mosalmot sa kalihokan.
Gikatakda usab nga ipahigayon ang usa ka prosesyon sa dakbayan sa Sugbo nga magsugod sa alas 4 sa hapon sa Osmeña Boulevard ug sundan sa misa sa Cebu Metropolitan Cathedral sa alas 5:30 sa hapon.
Ingon man nga ang dungan nga seremonyas sa pag-abli sa Sto.Tomas de Villanueva Parish-Danao alang sa mga parokya sa amihanang Sugbo, nga pangulohan ni Cebu Auxiliary Bishop Midyphil Billones.
Samtang si Cebu Auxiliary Bishop Ruben Labajo ang mangulo sa Archdiocesan Shrine of St. Catherine of Alexandria-Carcar alang sa mga parokya sa habagatang Sugbo, ug si Rev. Msgr. Vicente Rey Penagunda, PC sa St. Peter Parish sa Bantayan alang sa mga parokya nga nahimutang sa Bantayan Island.
