Kusganong gilimod ni Atty. Nicholas Kaufman, lead counsel ni kanhi Presidente Rodrigo Duterte, ang mga taho nga ang iyang kampo nangayo og limitasyon sa pagdawat og ID sa mga biktima nga gustong moapil sa imbestigasyon sa International Criminal Court (ICC) nga may kalabotan sa war on drugs.
Gitawag ni Kaufman nga ‘bakak’ ang pamahayag sa mga human rights lawyers nga sila si Joel Butuyan ug Kristina Conti nga gisalikway sa ICC ang ilang giingong sugyot nga limitahan ang mga madawat nga ID sama sa national ID o pasaporte”
Matod niya nga ang ilang gisumiter obserbasyon lang basi sa rekisitos sa Social Security System (SSS) sa Pilipinas, ug daw wala silay gipangayo sa ICC judges.
Apan matod nila Conti ug Butuyan, ang ICC Pre-Trial Chamber I mibarog sa desisyon nga dili limitahan ang mga dokumento nga magpamatuod sa pagkatawo sa mga biktima ngadto lang sa national ID ug passport, tungod kay kadaghanan kanila mga kabus ug walay ingon niini nga ID.
Namatikdan nga ang nasangpit nga desisyon kabahin sa 20 ka panid nga hukom sa ICC Pre-Trial Chamber I nga giisyu niadtong Abril 17, nga nagtugot sa paggamit sa ubang mga ID nga gi-isyu sa gobyerno sa pag-ila sa mga biktima sa ‘drug war.’
