Babaye, gipahawa sa trabaho tungod sayo kaayo kini mosulod sa opisina

Napildi ang usa ka empleyado sa Alicante, Spain sa iyang kaso human niya gikiha ang iyang amo tungod sa dili patas nga pagtangtang sa trabaho.

Ang hinungdan sa pagtangtang sa iyang amo kay kanunay siyang moadto sa trabaho og sayo sa buntag.

Sumala sa taho, ang babaye mosulod sa opisina og alas 6:45 sa buntag bisan pa og ang iyang shift alas 7:30.

Nangatarungan ang kompanya nga kini miresulta sa problema bisan wala kini trabaho niadtong panahona.

Gipasidan-an kini niadtong 2023, apan wala niya kini tagda.

Sa desisyon sa korte, gipaboran niini ang amo tungod kay ang pagpadayon sa babaye giisip nga “dili pagkamaunongon,” “paglapas sa pagsalig,” ug “pagsupak,” nga igo nga rason aron matangtang siya sa trabaho.