Gikabutyag ni Cebu City Councilor Dave Tumulak nga gahapong adlawa pa siya nasayud nga nagsugod na og labay sa mga basura gikan sa dakbayan sa Sugbo paingun sa Aloguinsan, basi ra usab sa giingun ni Paul Gelasque, ang pangu sa Department of Public Servies.
Matod ni Tumulak, subay sa gitino ni Galasque, upat ka adlaw na ang milabay sukad nga nsa sugdan na ang pagpanglabay sa mga basura gikan sa dinhi sa Sugbo paingun na sa Lungsod sa Aloguinsan.
Mao kini ang nahimong pamahayag ni Tumulak, atol sa eksklusibong pagkab-ot sa Bombo Radyo Cebu Newsteam kabahin sa kung unsa na ang umento sa hisgutanan sa basura sa dakbayan sa Sugbo.
Samtang, gihimug-atan usab niya nga dako ang giatubang nga problema karon sa Sugbo kung hisgutan na ang panudlanan, gumikan kay matod niya ang Sugbo aduna lay 517 million pesos karong tuiga para sa waste and disposal, diin lakip niini ang hauling.
Apan, gumikan sa disgrasyang nahitabo sa Binaliw landfill niadtong Enero 8, niluwat og kamandoan ang Department of Environment and Natural Resources (DENR) sa pagpahunong sa operasyon sa maong landfill. Hinungdan nga nagkaproblema ang dakbayan sa Sugbo kung asa ipanglabay ang mga basura.
Samtang, aminado usab ang maong konsehal nga nakabati siya og kahadlok nga mahurot na ang kantidad nga anaa sa panudlanan sa Sugbo tungod niini nga problema.
Gani, iyang gitataw nga taas ug layo na ang buwan sa Hulyo rong tuiga sa posibleng mahubsan og pundo ang Dakbayan sa Sugbo panbayad sa paglabay sa basura.
