CEBU CITY- Gihatagan og katin-awan sa Cebu City Police Office (CCPO) nga ang pagkalangay sa proseso posibleng nakaapekto sa resulta sa alcohol examination ni Sean Andrew Pajarillo, 21 anyos, nga giingong hubog sa hit-and-run incident nga mikalas sa kinabuhi sa batan-ong negosyante nga si Kingston Ralph Ko Cheng.
Sa press conference sa Miyerkules, Pebrero 11, gibutyag ni PLtCol. Jose Los Baños, information officer sa CCPO, nga miabot og 19 ka oras ang delay sa resulta tungod sa kakulang sa kagamitan sa pribadong ospital, walay ambulansya, ug proseso sa pagtugot.
Hinungdan, nga pasado alas 7:55 sa gabii lamang hingpit nga napahigayon ang examination, ug nagnegatibo ang resulta.
Base sa imbestigasyon, nahitabo ang insidente alas 12:53 sa kaadlawon sa Pebrero 8. Gidala sa mga emergency responder si Pajarillo sa usa ka pribadong ospital sa Mandaue City subay sa hangyo sa iyang amahan.
Pasado alas 1:50 sa kaadlawon, giubanan siya sa mga sakop sa Traffic Enforcement Unit (TEU) ug gidala sa emergency room sa ospital, dayon gisulod sa pribadong kwarto alang sa padayon nga confinement sa alas 2:20 sa hapon.
Nakig-alayon ang TEU pasado alas 2:50 sa hapon sa security manager sa ospital bahin sa liquor ug drug test, nga gi-refer dayon sa legal officer.
Gipasabot sa mga doktor pasado alas 4 sa hapon nga kinahanglan og boluntaryo nga pagtugot ni Pajarillo, nga gihatag dayon ug gi-refer sa laing doktor.
Nasayran nga walay magamit nga alcohol test sa pribadong ospital, hinungdan nga napugos ang mga awtoridad sa pagpadala niini sa Cebu City Medical Center (CCMC).
Laing pagkalangan ang nahitabo sulod sa gibana-bana nga 1 ka oras ug 30 ka minuto tungod sa kawalay ambulansya sa pribadong ospital.
Tungod niini, nalangay ang examination ug pasado alas 7:55 sa gabii lamang kini hingpit nga napahigayon, nga miresulta sa negatibo nga resulta sa alcohol test.
