Nasakmit sa Cebu City Police Office (CCPO) ang 154 ka mga mobile phones atol sa usa ka dako nga operasyon batok sa “anti-fencing” niadtong Enero 20, 2026, didto sa Leon Kilat Street, Dakbayan sa Sugbo.
Ubos sa pagdumala ni PCOL George V. Ylanan , gihimo ang maong lakang aron matubag ang dugay na nga problema sa pagkawala ug pagpangawat og cellphone nga sagad moresulta sa kahasol sa mga residente ug bisita, ilabi na panahon sa dagkong mga kalihukan.
Subay sa inisyal nga imbestigasyon, nasuta nga dili tanan sa mga narekober nga unit nakuha atol sa Sinulog Festival; ang uban niini nahuwam o nakawat pa niadtong tuig 2025 ug ang uban report usab sa wala pa ug human ang maong kasaulogan.
Narekober ang maong mga ebidensya sa ikaduhang andana sa Aljam Cellphone Accessories diin ang suspisado giingong adunay teknikal nga abilidad sa pag-access ug pag-unlock sa mga iPhone, hinungdan nga natago ug nagpabilin kaniya ang maong mga butang sulod sa taas nga panahon.
Kasamtangan pang gipamatud-an sa kapulisan ang maong impormasyon isip kabahin sa nagpadayon nga imbestigasyon samtang giandam na ang mga kasong kriminal batok sa suspisado. Atubangon sa dinakpan ang kalapasan sa Presidential Decree No. 1612 o ang Anti-Fencing Law, nga naglakip sa silot sa paghupot, pagtipig, ug pagnegosyo sa mga butang nga kininuha sa dautang paagi.
Giawhag karon sa CCPO ang mga biktima sa pagpakig-alayon kanila alang sa paghimo og mga affidavit nga gikinahanglan aron pormal nga mapasaka ang mga kaso subay sa legal nga proseso. Subli nga gipadayag sa Cebu City Police Office ang ilang walay puas nga pasalig alang sa kaluwasan sa publiko, pagpugong sa krimen, ug pagpatuman sa hustisya.
Nanawagan usab sila sa tanan nga daling i-report ang bisan unsang insidente sa kawat o pagkawala aron masiguro ang paspas nga imbestigasyon ug resolusyon sa mga kaso.
