PROVINCE OF CEBU- Nagpahigayon og stakeholders meeting ang Kagamhanang Lalawigan sa Sugbo kabahin sa hisgutanang kabalaka sa alokasyong sa dugang taxi slots para sa bag-ong mga electric vehicles (EVs) sa kadalanan.
Gipangulohan ni Cebu Provincial Governor Pamela “Pam” Baricuatro ang maong panagpulong didto sa Social Hall sa Cebu Provincial Capitol niadtong Lunes, Enero 5, 2026.
Gitambongan kini sa mga representantes gikan sa Land Transportation Franchising and Regulatory Board (LTFRB), electric vehicle operator nga Green & Smart Mobility, League of Municipalities of the Philippines (LMP) Cebu Chapter, Cebu Provincial Board, ug ni Cebu City Councilor Dave Tumulak.
Gani sa eksklusibong pakighinabi sa Bombo Radyo Cebu News Team kang Ainjeliz de la Torre-Orong, ang Public Information Officer sa Cebu Provincial Government diin gisaysay niini nga mitunga sa public consultation ang mga operators sa pampublikong sakayan sa kadalanan sa Sugbo aron tukion ang mga kabalaka sa EV taxis.
Dugang ni Orong nga ang baruganan sa gobernadora sa pagtugot sa EV taxis kay dili ang pagbabag sa inobasyon apan ang pagklaro nga dili kini hulga sa kaluwasan sa kadalaan ug sa kinaiyahan.
