CEBU CITY-Giaprobahan sa Sagguniang Panlungsod sa kagamhanang dakbayan sa Sugbo ang pagpasaka sa bayronon sa nagkadaiyang health and medical services sa mga City-owned hospitals sa dakbayan.
Kini human napasar sa konseho ang amendments sa Section 67, Chapter 18, sa Omnibus Tax Ordinance sa dakbayan sa Sugbo sa ikatulo ug katapusang pagbasa niini niadtong Nobyembre 20, 2024.
Sa eksklusibong pamahayag sa Bombo Newsteam kang Cebu City Councilor Jocelyn “Joy” Pesquera, ang Chairperson sa Committee on Health diin matod pa tumong sa maong lakang nga patas-an ang mga bayronon ug i-standardize ang mga bayronon ug bayranan sa nagkalain-laing serbisyong medikal ug panglawas nga gitanyag sa Cebu City Health Department (CCHD), Cebu City Medical Center (CCMC), ug Guba Community Hospital.
Dugang pa nga ang bag-ong rate gamiton usab sa pagpauswag sa mga ekipo, pasilidad, ug serbisyo sa ospital nga gipanag-iya sa Siyudad ug mga pasilidad sa medical.
Samtang sa pikas bahin, mipahayag sab si Cebu City Mayor Raymond Alvin Garcia diin giklaro niini nga ang pag-usbaw sa rates sa Cebu City Medical Center una nga makaapekto sa PhilHealth billing ug dili gyud makapabug-at sa publiko.
Gipasabot niya nga ang adjustment nag-align sa mga bayranan sa ospital sa kasamtangang billing standards.
