Nakapa-alarma kang Cebu City Councilor-elect Nice Archival ang iyahang nahiaguaman niadtong Hunyo 13, ang paghaguros ug kusog nga dagan sa usa ka sa Government-owned nga garbage truck gikan Banilad padung sa Talamban ning Dakbayan sa Sugbo.
Sumala sa pamahayag ni Archival sa iyahang social media post, na-alarma siya sa gikusgon sa dagan ug sa ka puno sa karga sa maong garbage truck, ilabi na nga anaa sila sa luyo niini.
Dugang niini, ang trak wala maselyohan pag-ayo, ug tungod sa kakusog, ang mga tinumpag – lakip ang usa ka baso nga botelya – nagsugod sa pagkahulog sa karsada.
Alang sa maong konsehal, dili lang kini maghatag og kahugaw, apan maghatag usab og piligro sa mga motorista, ug mahimong mosangko sa usa ka seryoso nga aksidente ug hulga sa mga motorista.
Apan sa higayon nga na tyempohan na kini niya, nikompronta siya sa drayber niini sa iyahang estilo sa pinadaganan, ug gani, gipangayuan niya kini og lisensya o bisan unsa nga mga identification, apan, pakyas kini kay walay matunol maski usa.
Nakamugna og repleksyon si Archival nunot sa iyahang nasaksihan, busa buot niya nga pagalantawan ang mga kauswagan nga kinahanglan ipatuman sama sa regular nga pagsusi sa lisensya alang sa mga drayber, pagpalig-on sa mga protocol alang sa pagsiguro sa mga kargamento sa basura, ug ang mandatory nga speed monitoring o pagpatuman sa mga polisiya. | via Bombo Irene Ardiente
