Giawhag sa buhatan sa Cebu City Department of Veterinary Medicine and Fisheries (DVMF) ang publiko nga lugwayan ang ilang malasakit sa mga kahayupan pinaagi sa pag-adopt sa mga naluwas nga mga binuhing iro ug iring.
Kini ang panawagan sa DVMF sa ilang kampanya nga pangitaan og bag-ong panimalay ang mga naluwas nga mga binuhing hayop human sa pipila ka semanang adunay malampusong adoption nga nakumpleto ang ilang buhatan.
Gani pasalig niini sa mga ganahan mu-adopt nga ang ilang mga mauyunang rescued pets kay gi-amuma sa veterinary care sama sa vaccinations, supplements, ug neutering aron masigurong baskog ug luwas ang mga kinabuhi niini.
Sa mga nanghinaot mu-adopt kay ipailawom kini sa DVMF og screening ug interview ingon man ang pagkuha sa mga detalye, balidong ID, ug pagpirma sa adoption agreement kauban ang pagbayad sa P200 nga initial veterinary services usa mahatag ang mga rescued pets sa mga bag-ong tag-iya.
