CEBU CITY-Gibutyag sa Cebu City Fire Station nga wala sila’y nadawat nga tawag sa nahitabong sunog sa Sitio Mabapo, Barangay Mambaling, Dakbayan sa Sugbo, niadtong Sabado, Marso 29, diin miugdaw sa 20 ka mga panimalay ug mikalas sa kinabuhi sa tulo ka mag-igsuon nga nag-edad og 6, 4, ug 3-anyos.
Mao kini ang gipaambit ni SF02 Wendell Villanueva, ang tigpamaba sa Cebu City Fire Station, nga ang mga fire personnel sa Pardo Fire Substation nga paingon unta sa South Road Properties alang sa ipahigayung seminar ug fire drills, ang nakabantay sa sunog alas 8:51 sa buntag ug naabot sila sa fire scene paglabay sa duha ka minuto, alas 8:53 sa buntag.
Gitataw ni Villanueva nga kasagaran, ang mga residente dali nga mag-post bahin sa mga emergencies sa social media apan pakyas sa pagpahibalo sa mga otoridad.
Diin mao kini ang usa sa mga gikapahiubsan sa opisyal tungod kay mas unahon pa ang facebook live kaysa motawag og bomber.
Migawas usab sa initial nga hinungdan sa sunog nga giimbestigahan mao ang mga bata kay nagduwa og posporo, ug ingon man nga daghan pa ang gikonsiderar nga laing rason.
Giawhag ni Villanueva ang mga ginikanan nga magmabinantayon ug hiposon ang mga peligrosong materyales sama sa posporo, kandila, ug butane canister nga dili maabot sa mga bata.
Sa pikas bahin, sa datus sa Cebu City Fire Office (CCFO), tali sa Enero ug Marso ning tuiga, 86 ka mga insidente sa sunog ang narespondihan nga nakaguba sa labing menos 77 ka mga estraktura, nga adunay gibanabanang danyos nga P24.1 milyones.
Kon itandi, gikan sa Enero hangtod Marso 2024, ang Cebu City Fire Station nakaresponde sa 110 ka insidente sa sunog, nga miresulta sa pagkaguba sa 90 ka mga estruktura ug pagkalugi sa kabtangan nga mokabat sa P48 milyones ug aduna nay kinatibuk-ang 6 ka kinabuhi ang nakalas sa sunog ning panahona.
