CENTRAL VISAYAS-Anaa sa dul-an sa 70,000 ka mga aspirants sa umaabot nga Barangay ug Sangguniang Kabataan Elections (BSKE) 2023 ang nakaduso na sa ilang certificate of candidacy (COC) sa nagkadaiyang buhatan sa Commission on Elections sa Central Visayas (Comelec 7).
Sa talaan sa Comelec 7 nagpakita nga 69,082 ka mga aspirants ang niduso sa ilang COC sulod sa unang upat ka adlaw sa filing period, gikan sa Agosto 28, 2023 hangtod sa Septiyembre 1.
Sa tibuok Central Visayas, ang talaan sa Comelec nagpakita nga 4,865 ka mga indibidwal ang nisang-at sa ilang COC alang sa barangay kapitan; samtang adunay 37,914 alang sa mga konsehal sa barangay; ug 4,188 alang sa SK chairman; ug 22,115 para sa SK members.
Sa maong ihap, ang Cebu City maoy adunay labing daghang indibidwal nga ni-file sa ilang COC nga anaa sa 29,432 kung diin mikabat sa 1,869 ang sa barangay kapitan; ug 15,354 sa mga konsehal sa barangay; ug 1,727 alang sa SK chairman; ug adunay 10,482 alang sa mga sakop sa SK.
Gisundan kini sa Bohol nga adunay kinatibuk-ang 23,792 ka indibidwal nga ni-file sa ilang COC; Negros Oriental nga adunay 13,021, ug Siquijor nga adunay 2,837 lamang.
Gibutyag ni Comelec 7 Director Lionel Marco Castillano, nga ang mga malampusong naka-file sa ilang COCs gikonsiderar na nga opisyal nga mga kandidato alang sa piniliay karong Oktubre 30, nga nagpasabot nga ang election protocols magamit kanila, lakip na ang pagdili sa pagpangampanya sa dili pa panahon.
Bisan paman niini, walay natala nga kagubot ang kapulisan sa Dakbayan sa Sugbo nga adunay kalambigitan sa umaabot nga pinilay.
Kini ang gibutyag ni ni Police Lieutenant Colonel Janette Rafter, ang deputy director for operations sa Cebu City Police Office (CCPO).
