CORDOVA-Gipasakahan og disqualification case sa Commission on Elections (Comelec) sila Incumbent Cordova Municipal Mayor Cesar “Didoy” Suan, Incumbent Vice-Mayor Victor “Boyet” Tago ug 7 sa mga ka line-up nga konsehales niini tungod sa pasangil nga “mass vote-buying” sa mga botante sa lungsod sa Cordova sa isla sa Mactan.
Gisang-at ang maong kaso sa diskwalipikasyon ngadto sa Comelec Law Department ni former Cordova Municipal Mayor Theres “Teche” Sitoy Cho diin personal kining midangop sa ahensya.
Ang mga ebidensya kay mao mismo ang mga kwartang gipang-istapleran kauban ang sample ballot nga adunay pangan ug numero nila Mayor Suan, Vice Mayor Tago, ug kaubanan.
Matod niini nga dakong kalapasan sa lagda sa piniliay ang gibuhat sa mga kandidato nga may kalabot sa vote-buying.
Dugang pa nga angayan pahamtangan silot bisan paman nga makadaog kini sa Mayo 12.
Samtang sa habig sa Comelec Cordova pinaagi sa pamahayag ni Arvin Maghanoy, ang Election Officer niini nga mibutyag kini nga matod pa sa resolusyon nga iluwat sa ilang Legal Department nga nakabase sa Comelec Main Office sa Manila kung unsay tukmang aksyon bahin niini ilabi sa higayon adunay tsansang makadaog ang mga gipasanginlan nga mga kandidato.
Sa pagkakaron, wala pay mando sa diskwalipikasyon nga atubangon ang mga gipasanginlan sa illegal nga binuhatan.
