CENTRAL VISAYAS- Adunay dakong pagkunhod sa crime rate nga natala sa tibuok rehiyon sa unang buwan sa 2025, kini ang gitaho sa tinugyanan sa balaod sa Central Visayas.
Matod sa Police Regional Office in Central Visayas (PRO-7), nius-os og 66.62 porsiyento ang krimen sa tibuok rehiyon niadtong Enero.
Ang datus sa ahensya nagpakita nga adunay kinatibuk-ang 256 ka insidente sa krimen ang natala niadtong Enero para karong tuiga.
Kini nga ihap mas ubos kon itandi sa miaging tuig nga natala nga 767 ka insidente sa krimen sa samang yugto sa panahon, nga nagtimaan sa pagkunhod sa 511 ka insidente o 66.62 porsyento.
Gihatagan og gibug-aton ni Police Brigadier General Redrico Maranan, regional director sa PRO-7, nga ang pag-us-os sa crime rate magpakita sa positibong trend sa pagkunhod sa kriminalidad sa rehiyon.
Dugang pa ni Maranan, nga kini nga kalamposan maoy repleksyon sa pagsunod sa law enforcement unit sa mga direktiba sa Philippine National Police (PNP) Chief nga nagpasiugda sa proactive policing, pakigtambayayong sa komunidad, ug pasalig sa pagserbisyo sa publiko.
Gidayeg usab niya ang mga police personnel sa tanang police units sa rehiyon nga dedikado sa pagtuman sa ilang mga katungdanan sa pagpausbaw sa police visibility aron masiguro ang kaluwasan sa mga lungsuranon.
