CENTRAL VISAYAS-Padayong nanghinaot ang buhatan sa Department of Education Central Visayas (DepEd-7) sa mga ginikanan nga ipa-enroll sa mga tunghaan sa ilang dapit ang ilang mga bata mahitungod kay wala pa nila nakab-ot ang target nga mga numero sa enrollees sa pag-abli sa klase niadtong buwan sa Hulyo.
Matod pa nga ni DepEd-7 Regional Director Dr Salustiano Jimenez nga bisan og nisaka ang gidaghanon sa mga na-enrol nga mga tinun-an, aduna gihapoy pipila nga wala pa maka-enroll.
Ang mga pampublikong tunghaan nagsugod sa klase niadtong Hulyo 29, ug pipila ka mga pribadong tunghaan nagsugod niadtong Agosto 12.
Apan, karong semanaha, ang mga ginikanan ug mga guardian nagpadayon pa sa pagpa-enrol sa ilang mga anak.
Duha ka semana human nagsugod ang klase, naobserbahan sa Director nga base sa mga taho gikan sa mga division offices niini sa sa Sugbo, nga nagkataas gihapon ang enrollment.
Sumala sa pinakaulahing datus nga gipaambit sa opisyal nga adunay 1,936,931 ka mga estudyante ang na-enrol sa tibuok Central Visayas.
Gipasabot ni Jimenez nga dunay mga tinun-an nga ulahi na nga nagpa-enroll o wala gihapon ma-enroll tungod kay apiki sa oras ang ilang mga ginikanan o guardians, o tungod sa pagbalhin sa gipuy-an.
Namatikdan usab ni Jimenez nga ang paglangan sa pagpalista mahimong negatibo nga makaapekto sa proseso sa pagkat-on sa bata.
