Mibutyag si Department of Education – Central Visayas (DepEd-7) Regional Director Salustiano Jimenez, nga nagpadayun pa gihapon ang pagsusi sa mga kahimtang sa mga school buildings kauban ang pipila ka sakop sa mga Engineers ug Disaster Risk Reduction Management.
Gahinay-hinay na usab ug sumiter ang buhatan sa situational report ngadto sa kaulohan aron mahatagan ug “Temporary Learning Space” ang mga tunghaan nga adunay grabeng kadaot, subay usab niini nakig-alayon sila sa Department of Public Works and Highways aron malugwayan usab ug pundo sa Quick Response Fund.
Sigon usab ni Jimenez, ang tanang 38-ka mga tunghaan sa Dakbayan sa Bogo, anaa gayu’y mga kadaot lakip na usab niini ang pipila ka mga kasigbit nga munisipalidad particular na sa San Remigio, Borbon, Medellin ug uban pa.
Gipanglantawan usab sa opisyal nga mataud-tauran pa gayud ang pagpabalik sa Physical Classes, hinungdan nga gipaningkamotan sa DepEd nga kinahanglang adunay modules ang matag-istudyante aron aduna silay matun-an samtang temporaryo unang gihunong ang klase sa mga classrooms.
Basi usab sa datos nga gihatag ni Jimenez, gibana-gibana nga sobra 50,000 ka mga istudyante ang naapektuhan sa linog, ug sa bahin usab sa mga naapektuhan nga mga classrooms, kinahanglang gub-on ang mga nakahiagum ug grabing kadaot samtang sa mga tunghaan nga diyutay ang kadaot mao kini ang ilang ipaubos sa retrofitting o i-rehabilitate.
Sa pikas bahin, mipahimangno usab si Jimenez nga unta dili unta mawad-an ug paglaum ang mga istudyante og magpabiling malig-on taliwala sa mga kalamidad nga nahiaguman.
