Nipasidaan ang Department of Health (DOH) batok sa nagkadaiyang sakit nga kasagarang motaas panahon sa ting-ulan.
Sumala sa DOH, ang leptospirosis maoy pinakadaghang natala nga kaso sa sunod-sunod nga mga bagyo ug kusog nga pag-ulan niadtong 2024.
Hinungdan nga ang tigpamaba sa DOH nga si Asec. Albert Domingo, nipahinumdom nga importanteng manghugas dayon sa lawas gamit ang limpyo nga tubig ug sabon kon molubog sa tubig baha, ug magpakonsulta dayon sa doktor kon gikinahanglan.
Gawas sa leptospirosis, kasagaran usab nga motaas ang kaso sa ubo ug sip-on, kalibanga, trangkaso, ug dengue panahon sa ting-ulan.
Ingon man nga giawhag sa DOH ang publiko sa pagpalig-on sa ilang resistensya, pagmintinar sa limpyo nga lawas, ug paglikay sa mga hugaw nga lugar.
Samtang, sumala sa PAGASA, 11 ngadto sa 20 ka mga bagyo ang posible sa nahibiling mga buwan sa 2025, apan gipaabot nga mas huyang kini kon itandi sa nangaging mga tuig.
